Зинол-Ғабден Бисенғали – филология ғылымдарының докторы (1997), профессор (1999). 1950 жылы 21 қаңтарда Атырау облысы, Құрманғазы ауданы, Алға ауылында дүниеге келген. 1972 жылы әл-Фараби атындағы Қазақ ұлттық университетінің филология факультетін үздік дипломмен аяқтап, кейін аспирантура мен докторантурада білімін жалғастырды. 1984 жылы «XX ғасыр басындағы қазақ прозасының қалыптасуы (1917 жылдарға дейінгі кезең)» тақырыбында кандидаттық, 1997 жылы «XX ғасыр басындағы қазақ романы» бойынша докторлық диссертациясын қорғады. Зинол-Ғабден Бисенғали ұзақ жылдар бойы әл-Фараби атындағы Қазақ ұлттық университетінде еңбек етті, профессор, кафедра меңгерушісі, ғылыми жетекші ретінде қызмет атқарды. Ол – Халықаралық Айтматов академиясының академигі, Қазақстан Жазушылар одағының мүшесі. Ғалым 500-ден астам ғылыми және ғылыми-танымдық еңбектердің, оқулықтар мен монографиялардың авторы. Оның зерттеулері Қытай, Жапония, Түркия секілді елдердің басылымдарында жарық көрген. Зерттеуші ХХ ғасыр басындағы қазақ прозасы мен роман жанрының қалыптасуына терең үңіліп, көркем мәтіндердің әдеби, тарихи, мәдени мәнін зерттеді. Абай шығармашылығына байланысты еңбектерінде оның қара сөздері мен поэзиясын пәнаралық және мәтіндік тұрғыдан талдауға ерекше мән берді. Ғалым Абайдың қара сөздерінің мазмұндық құрылымын, ондағы философиялық-танымдық жүйені анықтап, бұл шығармалардың Мұхтар Әуезовтің «Абай жолы» эпопеясымен ішкі байланысын арнайы зерттеді. Оның зерттеулері «Абайтану. Таңдамалы еңбектер» жинағында жарияланған. Зинол-Ғабден Бисенғали абайтануға әдістемелік жаңашылдықтар енгізіп, пәнаралық бағыттарды – әдебиеттану мен философия, эстетика мен аксиология, мәдениеттану мен мәтінтану ұстанымдарын ұштастыра отырып дамытқан.
