Зұфар Сейітжан – фольклортанушы-ғалым, әдебиет зерттеушісі, филология ғылымдарының докторы, профессор. 1941 жылы 27 мамырда ҚХР құрамындағы Шығыс Түркістан өңірінің Тарбағатай аймағы, Толы ауданындағы Бәйгетөбе ауылында дүниеге келген. Қазақ әдебиетінің теориялық және тарихи мәселелері бойынша іргелі зерттеулер жүргізген. Ұлттық болмыс пен әдебиетке жастайынан ден қойған ол 1965 жылы әл-Фараби атындағы Қазақ ұлттық университетінің филология факультетін тәмамдап, еңбек жолын ауыл мектебінде мұғалім болудан бастады. 1965–1975 жылдары Семей облысы, Таскескен ауданындағы Ыбырай Алтынсарин атындағы орта мектепте қазақ тілі мен әдебиетінен сабақ беріп, білім мен тәрбие саласында елеулі еңбек етті. 1975–1991 жылдары М. Әуезов атындағы Әдебиет және өнер институтында ғылыми қызметкер болып жұмыс істеді. Осы кезеңде қазақ фольклоры мен эпосына қатысты терең зерттеулер жүргізіп, отандық әдебиеттанудың дамуына айрықша үлес қосты. 1992 жылдан бастап әл-Фараби атындағы Қазақ ұлттық университетінде қазақ әдебиеті кафедрасының доценті, кейінірек профессоры қызметтерін атқарды. 2000 жылы филология ғылымдарының докторы ғылыми дәрежесін, 2004 жылы профессор атағын алды. Ғалым Абай шығармашылығын тек әдеби мұра ретінде емес, ұлттық болмыстың, дүниетанымның, тарихи сана мен мәдени жадының көрінісі ретінде қарастырды. Ғалым өз зерттеулерінде Абай дүниетанымының фольклорлық негіздерін, эпикалық сана мен ұлт рухының сабақтастығын терең талдады. Әдебиетші Абай өлеңдеріндегі танымдық сипаттарды, тәрбиелік маңызы мен адамгершілік қағидаларын фольклорлық дәстүрлермен сабақтастыра қарастырды. Абайдың қара сөздері мен лирикалық поэзиясын тарихи-мәдени контексте талдап, бұл мұраның қазіргі заманмен үндестігін айқындай білді. Зерттеуші ғалым «Абай антропологизмі» атты ғылыми мақаласында ұлы ақын шығармашылығындағы адамтану мәселесін кеңінен ашады.
